ചുരുക്കം സ്‌ക്രീനുകളിൽ ആരംഭിച്ചു, ഇന്ന് കളക്ഷനിൽ വൻ മുന്നേറ്റം ; കേരളത്തിലും തരംഗമായി 'ഡ്രാഗൺ'

350 ഷോകളാണ് രണ്ടാം ആഴ്ചയിൽ സിനിമയ്ക്ക് കേരളത്തിൽ ലഭിച്ചിരിക്കുന്നത്

അശ്വത് മാരിമുത്തുവിന്റെ സംവിധാനത്തില്‍ പ്രദീപ് രംഗനാഥൻ നായകനായി എത്തിയ ചിത്രമാണ് 'ഡ്രാഗൺ'. മികച്ച അഭിപ്രായം നേടിയ സിനിമ ബോക്സ് ഓഫീസിൽ വലിയ മുന്നേറ്റമാണ് നടത്തുന്നത്. ചിത്രം ഇതുവരെ 50.15 കോടി നേടിയെന്നാണ് റിപ്പോർട്ടുകൾ സൂചിപ്പിക്കുന്നത്. കേരളത്തിലും വലിയ മുന്നേറ്റമാണ് സിനിമ നടത്തുന്നത്.

ആദ്യ ആഴ്ചയിൽ ചുരുക്കം സ്‌ക്രീനുകളിൽ മാത്രം റിലീസ് ചെയ്ത ചിത്രം രണ്ടാമത്തെ ആഴ്ചയിൽ കൂടുതൽ സ്‌ക്രീനുകളിലേക്ക് മാറുകയാണ്. 350 ഷോകളാണ് രണ്ടാം ആഴ്ചയിൽ സിനിമയ്ക്ക് കേരളത്തിൽ ലഭിച്ചിരിക്കുന്നത്. ചിത്രം ഇതുവരെ കേരളത്തിൽ നിന്ന് 1.25 കോടിയാണ് നേടിയത്. മികച്ച അഭിപ്രയമാണ് സിനിമയ്ക്ക് ഇവിടെനിന്നും ലഭിക്കുന്നത്. ചിത്രത്തിന് ഇനിയും കളക്ഷൻ കേരളത്തിൽ നിന്ന് നേടാനാകും എന്നാണ് ട്രേഡ് അനലിസ്റ്റുകൾ സൂചിപ്പിക്കുന്നത്. തമിഴ്‌നാട്ടിൽ നിന്ന് മാത്രം സിനിമ 25 കോടിയോളം രൂപ നേടി. ലൗവ് ടുഡേ എന്ന ചിത്രത്തിന് ശേഷം പ്രദീപ് രംഗനാഥൻ നായകനായി എത്തുന്ന ചിത്രമാണ് ഡ്രാഗൺ. റൊമാന്റിക് കോമഡി ജോണറിൽ ഒരുങ്ങിയ സിനിമയിൽ അനുപമ പരമേശ്വരൻ, കയതു ലോഹർ, ഗൗതം വാസുദേവ് മേനോൻ, ജോർജ് മരിയൻ, കെ എസ് രവികുമാർ തുടങ്ങിയവരാണ് പ്രധാന അഭിനേതാക്കൾ.

#Dragon 350 shows for the 2nd week in Kerala. First week gross- 1.25 Crores approx. pic.twitter.com/lxNw3AsKqM

വിജയ് സിനിമയായ ദി ഗോട്ടിന് ശേഷം എജിഎസ് എൻ്റർടൈയ്ൻമെൻ്റ് നിർമ്മിക്കുന്ന സിനിമയാണിത്. കൽപ്പാത്തി എസ് അഘോരം, കൽപ്പാത്തി എസ് ഗണേഷ്, കൽപ്പാത്തി എസ് സുരേഷ് എന്നിവരാണ് സിനിമയുടെ നിർമാതാക്കൾ. നികേത് ബൊമ്മി ഛായാഗ്രഹണം നിർവഹിക്കുന്ന സിനിമക്കായി സംഗീതമൊരുക്കുന്നത് ലിയോൺ ജെയിംസ് ആണ്. ഓ മൈ കടവുളേക്ക് ശേഷം അശ്വത് മാരിമുത്തു - ലിയോൺ ജെയിംസ് കോംബോ ഒന്നിക്കുന്ന സിനിമയാണ് ഡ്രാഗൺ.

Content Highlights: Dragon gets good collection from kerala box office

To advertise here,contact us